केन्याद्वारा नेपाललाई १७८ रनको लक्ष्य प्रस्तुत

काठमाडौं/ नामिवियामा जारी आईसीसी विश्व क्रिकेट लिग डिभिजन टु केन्याले नेपाललाई १७८ रनको चुनौति पेश गरेको छ । युवा खेलाडी सन्दीप लामिछानेको उत्कृष्ट बलिङमा केन्याले सामान्य स्कोर बनाएको हो ।

टस हारेर पहिले ब्याटिङ गरेको केन्याले निर्धारित ओभरमा ५० ओभरमा ८ विकेटको क्षतिमा १७७ रन बनाएपछि नेपालले सामान्य चुनौति पाएको हो । केन्याका इर्फान करिम बसन्त रेग्मीको बलमा आउट हुनुअघि ४२ रन बनाए । केन्याका लागि एलेक्स ओबान्डाले ४१ रन बनाए ।

त्यस्तै, केन्याका कोलिन्स ओबुयाले २७, नेल्सन ओधियाम्बोले २४ र शम गोचेले २३ रन बनाए ।

नेपालका लागि सन्दीप लामिछाने एकलैले ५ विकेट लिएका छन् । निकै किफाती बलिङ गरेका सन्दीपले नेपाललाई राम्रो लयमा ल्याएका थिए । उनले आफ्नो १० ओभरमा ५ मेडन ओभर राख्दै २० रन खर्चेर ५ विकेट लिएका हुन् ।

त्यस्तै, नेपालका लागि बसन्त रेग्मी, सोमपाल कामी र शरद भेषवाकरले समान १–१ विकेट लिए ।