प्रदेश १ का स्वास्थ्य संस्थामा एकीकृत स्वास्थ्य सेवा

  • प्रकाशित मितिः चैत्र, 8, 2075
  • पहिलो किताब संवाददाता

पशुपतिगनर / प्रदेश नं १ का अस्पतालमा आउने बिरामीले आयुर्वेदिक, एलोपेथिक र होमियोपेथिक उपचार सेवा एकै ठाउँबाट पाउने भएका छन् । एउटै स्वास्थ्य संस्थामा तीनवटै पद्धतिको उपचार प्रदान गर्न प्रदेश सामाजिक विकास मन्त्रालयले ४० बढी चिकित्सक र स्वास्थ्यकर्मी थप गरी सेवा विस्तार शुरु गरेको हो ।

एकै स्वास्थ्य संस्थाबाट तीन पद्धतिको उपचार प्रदान गर्न प्रदेश सरकारले एकीकृत स्वास्थ्य सेवा शुरु गरेको प्रदेश १ का जडीबुटी आयुर्वेदविज्ञ समितिका सचिव तीर्थ आचार्यले जानकारी दिए । प्रदेश १ मा आयुर्वेदिक, एलोपेथिक र होमियोपेथिक पद्धतिको उपचार एकै ठाउँबाट कतिपय स्वास्थ्य संस्थामा शुरु भइसकेको छ भने कतिपयमा संरचना निर्माणको काम भइरहेको छ ।

आयुर्वेद औषधालय र जिल्ला अस्पतालको स्तरवृद्धि गरी पहिलोपटक होमियोपेथिक उपचार शुरु गर्न प्राविधिक जनशक्ति छनोट गरी काम शुरु भइरहेको प्रदेश नं १ का स्वास्थ्य निर्देशक भोगेन्द्र डोटेलले बताए ।

मन्त्रालयको निर्णयसँगै ताप्लेजुङ, पाँचथर, इलाम, दमक, उर्लाबारी, कटारी र भोजपुर जिल्ला अस्पतालबाट एलोपेथिकसँग आयुर्वेद सेवा प्रदान गरिने भएको हो । यस्तै इलाम, धनकुटा, इनरुवा, गाईघाट, ओखलढुङ्गा जिल्ला अस्पताल र झापा, मोरङका आयुर्वेद अस्पतालमा एलोपेथिक, आयुर्वेदिक र होमियोपेथिक उपचार सेवा शुरु गर्न बजेटकोे व्यवस्थापनसमेत भइसकेको जडीबुटी आयुर्वेदविज्ञ समितिका सचिव आचार्यले बताए ।

एक स्वास्थ्य संस्थामा तीन थरीको उपचार पद्धतिको सेवा दिन मन्त्रालयले चालू आर्थिक वर्षमा प्रत्येक जिल्ला अस्पताललाई रु एक करोड २६ लाखका दरले बजेट प्रदान गरको छ । एकीकृत स्वास्थ्य सेवाका लागि मन्त्रालयले आयुर्वेद औषधालयमा २८ र होमियोपेथिक उपचार सेवाका लागि १४ चिकित्सक र स्वास्थ्यकर्मी करारमा थप गरी सेवा शुरु गरेको हो ।

सरकारीस्तरबाट काठमाडौँमा मात्रै सीमित रहेको होमियोपेथिक उपचार पद्धतिको उपचार सेवा सरकारीस्तरबाट शुरु गर्न ठाउँठाउँमा स्वास्थ्य शिविरसमेत गर्ने काम भइरहेको प्रदेश नं १ स्वास्थ्य सेवा निर्देशनालय धनकुटाले जनाएको छ । बिरामीले आफ्नो छनोटअनुसार उपचार सेवा प्राप्त गर्न एकीकृत स्वास्थ्य सेवाको व्यवस्था गर्ने र सरकारीस्तरबाट सेवा नदिइएको होमियोपेथिक उपचार पद्धतिको प्रदेश तथा जिल्ला संरचना निर्माणका लागि काम भइरहेको सचिव आचार्यले जानकारी दिए ।

आर्चायका अनुसार समितिले होमियोपेथिक उपचार सेवा जनतामा पु¥याउन संरचना बनाउने बारेमा कार्ययोजना निर्माणको काम भइरहेको छ । बिरामीले निजी स्वास्थ्य संस्थाबाट मात्रै उपचार पाउँदै आएको होमियोपेथिक उपचार पद्धतिलाई प्राथमिकता साथ सेवा शुरु गर्न मन्त्रालयले एक साताअघि दुईदिने स्वास्थ्य शिविर पनि आयोजना गरेको थियो । तीस होमियोपेथिक चिकित्सकले सेवा प्रदान गरेको स्वास्थ्य शिविरमा एक हजार ५०० बढीले स्वास्थ्य जाँच गरेका थिए ।



पहिलो किताब मिडिया प्रालिद्वारा सञ्चालित

कम्पनी दर्ता नं. १७८०४९/०७४/७५

स्थायी लेखा नं. ६०६८५३१८१

सूचना विभाग दर्ता नं. ६००/०७४/७५

प्रेस काउन्सिल दर्ता नं. ८१०/२०७४/०७५

इटहरी उपमहानगरपालिका, सुनसरी

मोबाइल नं.: ९८५२०६३५३७

इमेल: pahilokitaab@gmail.com

वेबसाइट: www.pahilokitaab.com

प्रबन्ध निर्देशकः चन्द्रमणि कट्टेल

प्रधान सम्पादकः नवराज कट्टेल

व्यवस्थापकः प्रिया पौडेल

डेक्स सम्पादकः आयुशा कोईराला / गोपाल तामाङ

Copyright © 2017 - Pahilokitaab.com All rights reserved