‘एचआइभी संक्रमितको आयु साधारण मानिस जत्तिकै’

  • प्रकाशित मितिः जेठ, 29, 2076
  • पहिलो किताब संवाददाता

काठमाडौँ / एचआइभी/एड्सले ८० को दशकमा विश्वभर आतंक फैल्यायो । सन् १९८८ मा एचआइभीको प्रथम संक्रमित व्यक्ति फेला परे । ३१ वर्ष यता नेपालमा पनि एचआइभी जानलेवा संक्रमण मात्रै भएन डरलेवा संक्रमणका रुपमा पनि देखा पर्‍यो । तर पछिल्ला दिनहरुमा उपचार, औषधिहरुको उपलब्धताले यो संक्रमणविरुद्ध आशालाग्दा सफलता प्राप्त भएका छन् ।

एचआइभी/एड्स पूर्ण विसेक हुँदैन । शरिरबाट भाइरस सदाको लागि सामाप्त गर्ने विधि पत्ता लागेको छैन । तर यो संक्रमणविरुद्धका धेरै औषधिहरुले संक्रमितलाई सामान्य मानिससरह जीवन दिन सकिन्छ । हाल नेपालमा ३१ प्रकारका औषधिहरु प्रयोग भइरहेका छन् । संक्रमितको अवस्था वा भाइरल लोडको अवस्था हेरेर औषधि चिकित्सकहरुले सिफारिस गर्दछन् ।

सामान्यतः संक्रमितहरुले एकदेखि तीनवटा औषधि नियमित सेवन गरे पुग्छ । एचआइभीविरुद्धका औषधिहरुको प्रभावको चर्चा गर्ने हो भने केही अनौठा र आश्चर्यलाग्दा तथ्यहरु पनि छन् । जस्तो कि कुनै संक्रमितले नियमित औषधि सेवन गर्ने हो भने केही समयपछि उबाट अर्को व्यक्तिमा एचआइभी नसर्ने अवस्थामा पुग्छ ।

नियमित औषधि सेवन गरिरहेको व्यक्तिको जाँच पछि चिकित्सकहरुले उबाट ‘अर्को व्यक्तिमा भाइरस सर्दैन’ भन्न सक्छन् । जनसंख्याको १ प्रतिशत वा सो भन्दा बढीमा एचआइभी संक्रमण भयो भने त्यसलाई महामारीको रुपमा लिइन्छ । नेपालको हकमा स्थिति सुधारोन्मुख छ । नेपालमा सन् २०१८ सम्ममा अनुमानित विधिबाट ३१ हजार २२ संक्रमित छन् ।

जुन जनसंख्याको ०.१५ प्रतिशत हो । अर्थात नेपालमा एचआइभीविरुद्धको लडाईं विजयोन्मुख छ । तर केही निश्चित समूहका मानिसमा संक्रमण दर ५ प्रतिशतको हाराहारीमा छ । जस्तो कि यौनकर्मी, सुईबाट लागूऔषधि लिने समूह, पुरुष समलिंगी, भारतमा काम गरेका फर्केकाहरु, कैदीबन्दी आदिमा एचआइभीको संक्रमण उच्च छ ।

एचआइभीले कुनै पनि बर्ग, लिंग, पेशाका मानिसलाई छाडेको भने छैन । फिल्म सेलिब्रेटीदेखि राजनीति गर्ने हुन् वा मजदुरी गर्नेदेखि गृहिणीसम्ममा संक्रमण छ । रोगले भन्दा पनि सामाजिक विभेदको त्रासका कारण धेरैले गुपचुप औषधि सेवन गर्छन् । एचआइभीबाट अल्पआयुमा अब कसैले पनि मर्नु पर्दैन ।

तर सामाजिक तिरष्कार हटाउन सकिएको छैन । अझ गरिब र निमुखालाई संक्रमण भयो भने उनीहरु बढी नै तिरष्कारको सिकार हुन्छन् । एचआइभी संक्रमण भएको चाँडै थाहा पाउने हो र औषधि शुरु गरिहाल्ने हो भने त्यस्तो संक्रमितले सामान्य मानिस सरह पूरा जीवन बाँच्न सक्छ । आफ्ना जीवनका सबै सपनाहरु पूरा गर्न सक्छ ।

नेपालमा संक्रमण भएको १८ वर्षसम्म औषधि नखाइ त्यसपछि खान थालेको दावी गर्नेहरु पनि छन् । कुनै पनि भाइरसले चाँडो आफ्नो रुप परिवर्तन गर्छन् । एचआइभीको पनि त्यस्तै हुन्छ । औषधि नियमित भएन भने भाइरसले आफ्नो स्वरुप परिवर्तन गरेर औषधिसँग रेसिस्टेन्ट हुने क्षमता विकास गर्छ । यसकारण औषधि नियमित सेवन गर्नुपर्छ भनिएको हो ।

 

 



पहिलो किताब मिडिया प्रालिद्वारा सञ्चालित

कम्पनी दर्ता नं. १७८०४९/०७४/७५

स्थायी लेखा नं. ६०६८५३१८१

सूचना विभाग दर्ता नं. ६००/०७४/७५

प्रेस काउन्सिल दर्ता नं. ८१०/२०७४/०७५

इटहरी उपमहानगरपालिका, सुनसरी

मोबाइल नं.: ९८५२०६३५३७

इमेल: pahilokitaab@gmail.com

वेबसाइट: www.pahilokitaab.com

प्रबन्ध निर्देशकः चन्द्रमणि कट्टेल

प्रधान सम्पादकः नवराज कट्टेल

व्यवस्थापकः प्रिया पौडेल

डेक्स सम्पादकः आयुशा कोईराला / गोपाल तामाङ

Copyright © 2017 - Pahilokitaab.com All rights reserved